लामोसाँघु–जीरी सडकमा चरम लापरबाही, कामचोर ठेकेदारलाई किन हुँदैन कारबाही ? (फोटो डायरी)

मिसन खबर १९ भाद्र २०७५, मंगलवार १७:२०

दोलखा–सुरज बस्नेत । दोलखाबाट राजधानी काठमाडौं भित्रिने प्रमुख प्रवेशमार्ग लामोसाँघु–जिरी सडकको यो हालत । सडकको अवस्था बारे केही भन्नैपर्दैन दृश्यबाट आफै झल्किन्छ । फराकिलो बनाउने क्रममा भैरहेको ढिलाईले बढेको सकस झन–झन बिकराल बन्दैछ ।

यो हिले सडकको वास्तबिकता । दोलखाबासीको यात्रा लम्बिएको मात्रै छैन, जोखिम पनि उत्तिकै बढेको छ । दुई बर्षमा काम सक्नेगरी तीन वर्षअघि सडक विभागले ठेक्कामा दिएको थियो यो सडक ।

५० करोड ७२ लाख ३६ हजार ४ सय ५८ रुपैयाँको लागतमा पहिलो प्याकेज – सिन्धुपाल्चोकको खाडीचौरदेखि मुडेसम्म २५ किलोमिटर, सुनौला खिम्ती र गौरी पार्वतीको जिम्ममा ५० र भारतीय ठेकेदार कम्पनी सीमाञ्चलको जिम्मामा ५० प्रतिशतको जिम्मेवारी । दुई वर्षभित्र कालोपत्रे गरेर हस्तान्तरण गर्ने गरी २०७२ कात्तिक ८ गते सम्झौता, ठेक्का व्यवस्थापक थियो सुनौला खिम्ती ।

दोस्रो प्याकेज– मुडेदेखि चरिकोटसम्म ३० किलोमिटर खण्ड : भारतीय कम्पनी सकिल हैदरको ५० प्रतिशत र नेपाली कम्पनी शंकर माली र सुनौला खिम्तीको २५–२५ प्रतिशत जिम्मेबारी ।

२०७२ चैतमा सम्झौता, सडक अलपत्र । सडक सकस र ठेकेदारको बेवास्था बारे स्थानीय तहका जनप्रतिनिधि र जिल्लास्थित सरोकारवाला निकाय बेखबर छन् ।

ठेकेदारहरुले भदौ ७ गते दोलखा, चरिकोट र रामेछापका जनप्रतिनिधि, प्रदेश सभाका मन्त्री सहितका सरोकारवाला पक्षसँग १० दिन भित्र सडकको स्तर सुधार गर्ने लिखित प्रतिबद्धता गरेका थिए । तर अहिले पनि सडकको हालत उस्तै छ । काम नगर्ने ठेकेदारको बदमासी आखिर रोक्ने कसरी अनि कस्ले ?