नागढुंगा सुरुङ मार्ग निर्माणमा १५ नेपाली कम्पनी इच्छुक, ०७८ दशैं अगाबै सञ्चालन लक्ष्य

मिसन खबर २५ आश्विन २०७५, बिहीबार ०६:४५

काठमाडौं– नागढुंगा सुरुङ मार्ग निर्माणका लागि १५ वटा नेपाली कम्पनीले इच्छा जहोर गरेका छन् । सडक विभागअन्तर्गतको वैदेशिक सहायता कार्यान्वयन महाशाखामा परेको बोलपत्र खरिद अनुसार १५ नेपालीसहित ४२ कम्पनी सुरुङमार्ग निर्माणमा इच्छुक देखिएका हुन् ।

सुरुङमार्ग बनाउने कम्पनी छान्न महाशाखाले साउन २४ गते ६० दिने सार्वजनिक सूचना जारी गरेकोमा चिनियाँ २१, नेपाली १५, जापानिज तीन, भारतीय दुई र टर्किस एक कम्पनीको बोलपत्र परेको छ । महाशाखाका अनुसार अन्तिमदिन बुधबार कुनैपनि प्रस्ताव नआएपछि प्रस्ताव बुझाउने म्याद १५ दिन थप भएको छ । २० लाख रुपैयाँ प्रतिबोलपत्र मुल्य तोकिएको सुरुङ निर्माणमा सहभागीता जनाउने कम्पनीले टेन्डर प्रक्रियामा सहभागी हुनै २० करोड रुपैयाँ बैंक ग्यारेन्टी राख्नुपर्नेहुन्छ । यसलै पनि विदेशी कम्पनी बढी भएको बताइन्छ । तिब्र प्रतिस्पर्धाबाट उत्कृष्टलाई अवसर दिनकै लागि दुई महिनामा थप १५ दिने समय उपलब्ध गराएको महाशाखाको दाबी छ ।

सडक विभागअन्तर्गतको वैदेशिक सहायता कार्यान्वयन महाशाखाका उपमहानिर्देशक सञ्जयकुमार श्रेष्ठ पनि धेरै कम्पनीको टेण्डरबाट ऋणदाता जाइकाले उत्कृष्टलाई छान्ने विश्वास गर्छन । सुरुङमार्ग बनाउन इच्छुक कम्पनीको प्रस्तावको मूल्यांकन र आवश्यक स्वीकृतिका लागि ऋणदाता जाइका पठाइने महाशाखाले जनाकारी दिएको छ । जाइकाको मूल्यांकनबाट प्राविधिक रूपमा सक्षम देखिएका कम्पनीले मात्रै आर्थिक प्रस्ताव सहितको टेण्डरमा सहभागिता पाउनेछन् । काठमाडौंबाट थानकोट हुँदै बाहिरिने र भित्रिने सवारीसाधनको सहजताका लागि भन्दै नागढुंगामा सुरुङमार्ग बनाउन प्रस्ताव आह्वान गरिएको हो ।

नेपाल सरकारसँग यसअघि भएको सहमतिअनुसार जाइकाले सुरुङमार्ग बनाउन १६ अर्ब ६३ करोड ६० लाख जापानी येन (१६ अर्ब ४६ करोड ९६ लाख रुपैयाँ) सहुलियत ऋण उपलब्ध गराइसकेको छ । आगामी ४० वर्षका लागि ०.१ प्रतिशत सहुलियत ब्याजदरमा जापानले दिएको ऋण सुरुङमार्गमा खर्च गर्ने गरी प्रक्रिया अगाडि बढाएको सरकारी दाबी छ । सुरुङमार्ग निर्माणका लागि ग्लोबल टेन्डर आह्वान गरिएकाले राष्ट्रिय तथा अन्तर्राष्ट्रिय कम्पनीले भाग लिन पाउनेछन् । सुरुङमार्ग निर्माणमा गर्न २२ अर्ब रुपैयाँ लाग्ने प्रारम्भिक अनुमान छ । मुअब्जा र निर्माण क्षेत्रमा खटिने कर्मचारीका लागि अपुग देखिने ६ अर्ब रुपैयाँ सरकारले व्यहोर्ने छ ।

ठेक्का पाउने कम्पनीले २.६८८ किलोमिटर सुरुङमार्गसहित त्रिभुवन राजपथबाट काठमाडौंतर्फ २.३० किलोमिटर र धादिङतर्फ धुनिबेसीको सिस्नेखोलाबाट सुरुङमार्ग प्रवेशद्वारसम्म पाँच सय ६५ मिटर पक्की सडक बनाउनुपर्नेछ । साँढे नौँ मिटर चौडा हुने सुरुङमार्गको सडक बीचको साँढे एक मिटर बाहेक दुईलेनमा बाढिनेछ । दुबै लेन साढे तीन मिटर चौडा हुनेछन् । सुरुङमार्ग प्रवेश गर्ने सडकमा तीनवटा पुल, दुई अन्डरपास र एक एक वटा ओभर पास तथा फ्लाई ओभर रहने बताइएको छ । कम्तीमा पाँच मिटर लम्बाइको यो सुरुङमार्ग प्रवेश गर्ने बाटोका खोल्सामा ११ वटा कल्भर्ट राख्नुपर्ने र आकस्मिक अवस्थाका लागि निकासी सुरुङ पनि ठेकेदार कम्पनीले नै निर्माण गर्नुपर्ने प्रावधान राखिएको छ । न्यूनतम अंक कबुल गर्ने कम्पनीले सुरुङमार्गको ठेक्का पाउने व्यवस्था अनुसार ठेकेदार छनोट प्रक्रिया जनवरी २०१९ तोकिएको छ ।

ठेक्का पाएको ४२ महिनाको समयमा सुरुङमार्ग र आवश्यक पूर्वाधार निर्माण सक्नेगरी विभाग र ठेकेदारपक्षबीच सम्झौता हुनेछ । निर्माण कम्पनी आफैंले आवश्यक प्राविधिक सामग्री जुटाएर काम गर्नुपर्नेछ । सुरुङमार्गका लागी आवश्यक तीन सय ७६ रोपनी जग्गा अधिकरणको काम आगामी पुसभित्र सकिने सरकार दाबी छ ।

क्याटेगोरी : अर्थ / रोजगार, विकास / पुर्वाधार, सकारात्मक सोच, समाचार
ट्याग : #hot