पाल्पा–बुटवल सडकखण्ड तीन दिन बन्द रहने, स्तरउन्नती गरेर जोखिम न्यूनिकरणको प्रयास

मिसन खबर १६ मंसिर २०७५, आईतवार ०१:३०

पाल्पा – बुटवल–पाल्पा सडक खण्डको स्तरोन्नति गरिने भएको छ । बुटवल–पाल्पा सडकखण्ड अन्तर्गत तिनाउ गाउँपालिकाको दोभानको चिडियाखोलादेखि भुतखोला सडकखण्डमा दैनिक रुपमा काम हुनेभएपछि मंसिर १७ गतेदेखि १९ गतेसम्म पाल्पा–बुटवल सडक खण्ड बन्द हुने भएको छ ।

सडक स्तरोन्नतीको काम हुने भएकाले बिहान १० बजेदेखि ४ बजेसम्म केराबारीदेखि चिडियाखोलासम्म अत्यावश्यकीय सवारीबाहेक अन्य सवारीसाधन सञ्चालन नगर्न पूर्णरूपमा बन्द हुने भन्दै डिभिजन सडक कार्यालयले सूचना नै निकालेको छ । सडकको कामले अबको दुईदिनपछि बिरामी बोकेका एम्बुलेन्सबाहेक अन्य सवारीसाधन यो सडक खण्डमा रोकिने भएका छन् । सडकमा खसेको ढुङ्गा तथा पहिरो पन्छाउन अनि केही ठाउँको साँघुरो सडक विस्तार गर्न बाध्य भएर सडक नै अवरुद्ध पार्नुपरेको सडक विभाग बताउँछ । दोभानको चिडियाखोलादेखि भुतखोला क्षेत्रको सडक सधै जोखिममा रहेको भन्दै गुनासो आउने गरेको थियो । दोभानको सिद्धबाबा क्षेत्रमा हिउद र वर्षायाममा पहिरो खसेर मानवीय क्षति हुँदै आएको थियो ।

केही दिन सडक अबरुद्ध भएपनि अवको स्तरउन्नतीले जोखिमको दिगो समाधान गर्ने अपेक्षा सवारी चालक तथा यात्रुले गरेका छन् । बाँकी नतिजा आगामी दिनमा तयार हुने सडकले देखाउला ।

क्याटेगोरी : यातायात / यात्रा, विकास / पुर्वाधार, समाचार
ट्याग : #hot