जाडोमा कठ्याङ्ग्रीएका विपन्नलाई बर्षादमा ओतको चिन्ता, प्राधिकरण भन्छ– ७७ प्रतिशत निजी निर्माण सम्पन्न

मिसन खबर ११ पुष २०७५, बुधबार १०:१९

काठमाडौं–राष्ट्रिय पुनर्निर्माण प्राधिकरणले ७७ प्रतिशत निजी आवास निर्माण पुरा भएको दाबी गरिरहँदा भूकम्प प्रभावित क्षेत्रका हजारौँ अहिलेपनि टहरोमा बस्न बाध्य छन् । पुनर्निर्माणका लागि सम्झौता गरिएका ७ लाख ४२ हजार १ सय ३५ मध्ये ३ लाख ३७ हजार ३ सय १९ वटा निजी आवास निर्माण पूरा भएको र २ लाख ३३ हजार ३ सय ४३ वटा घर अन्तिम चरणमा रहेको राष्ट्रिय पुनःनिर्माण प्राधिकरणले बताएको छ ।

अझ प्राधिकरण ३२ प्रतिशत बाँकि निजी आवास पनि चालू आर्थिक वर्षमै पुरा हुने दाबी गरिरहेको छ । तर प्रभावित क्षेत्रमा भएको कार्यप्रगती भने प्राधिकरणको दाबी जस्तो पाइदैन् । अझै पनि धादिङ, रामेछाप, दोलखा, सिन्धुपाल्चोक, ओखल्ढुंगा, सोलुखुम्बु, खोटाङ लगायतका जिल्लामा प्राविधिकहरुको उपस्थिति र कामको प्रगती बुझ्ने प्रतिनिधिहरु समयमा नपुग्दा पुनःनिर्माण प्रभावित भैरहेको छ । कामको गति बढाउन पनि प्राधिकरणको चासो दिनुपर्ने देखिन्छ ।

केही स्थानमा भने भूकम्पपछिको पुनर्निर्माणलेले गाउँकै मुहार फेरेको छ भने स्थानीय भक्कि घरमा ओत पाएकोमा खुसीले दंग छन् । आर्थिक हैसियत र महंगो खर्चमा समेत आवश्यक श्रोतसाधन जोहो गर्न सक्नेहरुले निजी आभाष समयमै बनाएपनि विपन्नहरु अझै पनि टहरोमा बसेर जाडो काटिरहेका छन् । उनीहरुले बर्षादमा पनि पक्कि ओत पाउने सुनिश्चितता छैन । यस्ता समूदाय तथा परिवारलाई राज्यले विशेष सहयोग गर्न पनि ध्यान दिने हो कि ?

यता, राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवाली सम्पदाहरुसहितको सबै पुनर्निर्माणको काम दुई हजार ७७ कार्तिक महिनाभित्र सम्पन्न गर्ने दाबी गर्छन् । एकीकृत बस्ती विकास, जोखिमयुक्त बस्ती स्थानान्तरणको काम पनि आगामी आर्थिक वर्षभित्र सम्पन्न गर्ने लक्ष्य सहित प्राधिकरणले काम गरिरहेको दाबी गरिरहँदा जोखिम क्षेत्रबाट बस्ती स्थानान्तरको काम नै सुरु भएको छैन ।

हालसम्म ८० प्रतिशत शैक्षिक संस्था, ६६ प्रतिशत स्वास्थ्य संस्था, ९५ प्रतिशत सरकारी भवन पुनर्निर्माण गरिएको प्राधिकरणले दाबी गरिरहँदा विपन्नको साथमा भने सरकारले सक्रियता बढाएर साथ दिएको देखिदैन् ।