बैकल्पिक पठनपाठन र परिक्षाको तयारी, मन्त्री पोखरेल भन्छन् “एक सातामा निर्णय”

दिपक अर्याल २२ जेष्ठ २०७७, बिहीबार १५:३१

काठमाडौं । शिक्षा, विज्ञान तथा प्रविधिमन्त्री गिरिराजमणि पोखरेलले माध्यमिक शिक्षा परीक्षा कक्षा १० (एसइई), कक्षा ११ र १२ को परीक्षाका बारेमा एक साताभित्र निर्णय सार्वजनिक गर्ने बताएका छन् ।

शिक्षा पत्रकार सञ्जाल (इजोन)ले बिहिबार आयोजना गरेको भर्चुअल संवादमा मन्त्री पोखरेलले तीन वटा परिक्षाका विषयमा विभिन्न तीन विकल्पमा अध्ययन भइरहेको जानकारी गराउँदै आगामी साताभित्र निचोडमा पुगिने बताएका हुन् । अहिले परीक्षा सञ्चालन गर्न सकिन्छ वा सकिँदैन, परीक्षा सञ्चालन गर्न सम्भव नभए राष्ट्रिय परीक्षा बोर्डले मान्यता दिन कस्तो कानूनी उपाय अवलम्बन गर्नुपर्छ र कक्षा १० को परीक्षालाई नयाँ रूपमा सञ्चालन गर्न सकिन्छ वा सकिँदैन भन्ने विकल्पका मन्त्रिपरिषद्ले निर्णय गर्ने उनले बताए ।

मन्त्री पोखरेलले बन्दाबन्दीपछि अन्तिममा शिक्षण संस्था नै खुल्ने र त्यतिञ्जेलका लागि अस्थायी समाधान गर्न वैकल्पिक प्रणालीबाट विद्यार्थीको सिकाइ सहजीकरण निर्देशिका कार्यान्वयनमा ल्याइएको जानकारी दिए । उनले भने- “आगामी असार १ गतेबाट विद्यालय खोल्न खोजिएको होइन, तत्कालका लागि कसरी पठनपाठन गर्ने भन्ने विकल्पको अभ्यास गर्न लागिएको हो ।”

४५ दिनपछि पनि यस्तै अवस्था रहेमा विभिन्न तीन योजनाका साथ अगाडि बढ्ने, दशैँ अगाडि कसरी जाने र दशैँ पछाडि कसरी जाने भन्ने योजना बन्ने मन्त्री पोखरेलले बताए । “मन्त्री पोखरेलले निर्देशिका कार्यान्वयनमा स्थानीय तहको भूमिका नै महत्वपूर्ण हुने स्पष्ट पार्दै भने -“पहिलो १५ दिनको काम हेरौँ । सबै विद्यार्थी त्यसबाट लाभान्वित भए त्यसलाई शैक्षिकसत्रसँग जोड्न सकिन्छ र त्यसले औपचारिक मान्यता पनि पाउनसक्छ ।”

क्याटेगोरी : देश / प्रदेश, विकास / पुर्वाधार, शिक्षा / स्वास्थ्य, समाचार
ट्याग : #hot