श्रम गन्तब्य मुलुकमा ६० हजार बढी नेपाली अलपत्र, राजदूतहरु भन्छन्– “उडान संख्या बढाऔँ”

मिसन खबर ६ आश्विन २०७७, मंगलवार १२:२१

काठमाडौं । वैदेशिक रोजगारी र अन्य कामले विदेश गएर कोभिड– १९ का कारण स्वदेश आउन रोकिएकाहरुलाई ल्याउन नियमित उडान संख्या थप्नुपर्ने माग सम्बन्धित देशका नेपाली राजदूतहरुले गर्न थालेका छन् ।प्रतिनिधिसभाको उद्योग तथा वाणिज्य र श्रम तथा उपभोक्ता हित समितिसँगको भर्चुअल बैठकमा मलेसिया, खाडी लगायत श्रम गन्तव्य मुलुकका राजदूतहरूले यस्तो आग्रह गरेका हुन् ।

परराष्ट्र मन्त्रालय, पर्यटन मन्त्रालय र श्रम, रोजगार तथा सामाजिक सुरक्षा मन्त्रालयलाई उक्त कुराको जानकारी गराएको बताउँदै राजदूतहरुले समितिलाई पनि उक्त विषयमा मन्त्रालयसँग छलफल गरिदिन आग्रह गरे । मलेसियाका लागि नेपाली राजदूत उदयराज पाण्डेले ११ हजार बढी नेपाली श्रमिक स्वदेश फर्किए पनि अझै करिब ८ हजारले फर्किनका लागि दूतावासमा नाम दर्ता गराएको जानकारी दिए । स्वदेश फर्किन नाम दर्ता गराएका बाहेक हरेक दिन ३ सय नेपालीहरूको भिसा अवधि सकिने उनको दाबी थियो । प्रत्येक साता मलेसियाका लागि १६ वटा नियमित उडान आवश्यक पर्ने उनको दाबी थियो । कुवेतका लागि नेपाली राजदूत दुर्गाप्रसाद भण्डारीले राजदूतावासमा स्वदेश फर्किनका लागि भनेर नाम दर्ता गराउनेको संख्या ९ हजार २ सय भन्दा बढी रहेको बताए ।

कतारमा स्वदेश फर्किन चाहनेको संख्या २० हजारभन्दा बढी रहेको राजदूत नारदनाथ भारद्वाजले जानकारी दिए। कतारका लागि दैनिक ४ वटा उडान गर्न नसके १६ हजार भन्दा बढी र दसैं–तिहारमा घर फर्किन चाहनेहरू समस्यामा पर्ने राजदूत भारद्धाजले बताए। साउदी अरेबियाका लागि नेपाली राजदूत महेन्द्रप्रसाद सिंह राजपुतले २८ हजार बढीले स्वदेश फर्किन निवेदन दिएकोमा १० हजारलाई मात्रै पठाउन सकिएको जानकारी दिए । मलेसियाका लागि नेपाली राजदूत पाण्डेले कल्याणकारी कोषबाट उद्धार गर्ने नीति सरकारले लिएपनि व्यवहारिक हुन नसकेको भन्दै परिमार्जन गर्न संसदीय समितिलाई आग्रह गरे ।

क्याटेगोरी : ओझेलका पात्र, जीवन भोगाई, देश / प्रदेश, विकास / पुर्वाधार, समाचार
ट्याग : #breaking