माघ ७ बाट २० दिन तातोपानी नाका बन्द रहने, व्यवसायी चिन्तामा

मिसन खबर २७ पुष २०७७, सोमबार ०६:०२

काठमाडौं । नेपाल–चीन महत्वपूर्ण नाका तातोपानी नाका २० दिन बन्द हुने भएको छ । सीमामा रहेको मितेरी पुल पुनर्निर्माणका लागि माघ ७ (२० जनवरी) देखि नाका बन्द गर्न लागिएको चिनियाँ पक्षले तातोपानीस्थित भन्सार कार्यालयलाई जानकारी गराएको हो ।

तातोपानी भन्सार प्रमुख लाबहादुर खत्रीले बाढीले क्षति पुर्याएको पुल पुनर्निर्माणका लागि २० जनवरबाटी बढीमा २० दिन नाका बन्द रहन सक्ने जानकारी चिनियाँ पक्षबाट आएको जानकारी दिनुभयो । पहिलेकै बाढीले क्षति पुर्याएको पुलको एक भागामा केही दिनअघिको बाढीले थप क्षति गरेपछि चिनियाँ पक्षले मर्मत गर्न लागेको जनाइएको छ । तिब्बतबाट प्राविधिक मगाएर चिनियाँ पक्षले पुलको अवस्था जाँच गरेपछि मर्मत गरिने निश्चित भएको थियो । बढीमा तीन सातामा पुल मर्मत सकिने बताइएको छ । पुल मर्मतकालागि नाका बन्द रहने भएपछि बाटोमा रहेका सामानहरु छिटो ल्याउन पहल भइरहेको भन्सार कार्यालयले जानकारी दिएको छ । हाल दैनिक १८ वटा कन्टेनरमार्फत नाकाबाट सामान भित्रिरहेको भन्सार कार्यालयले जनाएको छ । पुल मर्मत गर्दा बाटोमा सामान नअड्कियोस भनेर छिटो–छिटो सामान ल्याउँदा भन्सारको राजश्व तीन सातामै १८ करोड पुगेको छ ।

साउन देखि मंसिरसम्म १७ करोड राजश्व संकलन भएकोमा पुस महिनाको तीन सातामै १८ करोड राजश्व संकलन भएको भन्सार प्रमुख खत्रीले जानकारी दिनुभयो । कोभिड र बाढीका कारण चीनतर्फका महत्वपूर्ण व्यापारिक नाकाहरु लामो समयदेखि अवरुद्ध हुँदै आएका छन् । नाकामा भएको अवरोधले दुई देशबीचको व्यापार अवरुद्ध भएको भन्दै नेपाली व्यवसायीले भने बारम्बार चिन्ता व्यक्त गर्दै दिर्घकालिन पहल गर्न सरकारसँग आह्वान गर्दै आएका छन् ।

क्याटेगोरी : देश / प्रदेश, विकास / पुर्वाधार, समाचार
ट्याग : #hot