Techie IT
Mission Khabar

काठमाडौमा ६० देखि ६४ र उपत्यकाबाहिर ६२ देखि ६४ वर्षकालाई खोप


काठमाडौं । सरकारले आजदेखी देखि ६० देखि ६४ वर्ष उमेर समूहकालाई खोप दिने भने पनि अन्तिम समयमा आएर उमेर समूह परिवर्तन गरिएको छ । काठमाडौं उपत्यकामा ६० देखि ६४ वर्षका नागरिकलाई खोप दिइदैछ भने काठमाडौं उपत्यकाबाहिर ६२ देखि ६४ वर्ष उमेरकालाई मात्र खोप दिन सुरु गरिएको खोप शाखाका प्रमुख डाक्टर झलक शर्मा गौतमले जानकारी दिनुभयो ।

कोभिड खोप विज्ञ सल्लाहकार समितिका संयोजक डाक्टर श्यामराज उप्रेतीले खोपको अभाव रहेकाले जोखिमलाई मध्यनजर गरेर प्राथमिकताका आधारमा ६० देखि ६२ को साटो ६२ देखि ६४ वर्षका नागरिकलाई खोप दिन लागिएको जानकारी दिनुभयो । ६० देखि ६४ वर्ष उमेर समूहका नागरिक आठ लाख ५४ हजार रहेकाले खोपको दोस्रो मात्रा नपुग्ने भन्दै खोप लगाउने पूर्वसन्ध्यामा ६२ देखि ६४ वर्षकालाई खोप दिनेगरि उमेर समूह सच्चाइएको छ । चीनले केही दिनअघि अनुदानमा पठाएको १० लाख डोज खोप मंगलबारदेखि देशभर लगाइँदैछ । ६२ देखि ६४ वर्ष उमेर समूहका नागरिक चार लाखभन्दा धेरै छन् । यसले गर्दा चीनबाट आएको खोपले दोस्रो डोज दिन पुग्ने आँकलन गरिएको छ । खोप लगाउन जाँदा नागरिकता वा उमेर खुल्ने कुनै पनि सरकारी कागजात वा वडा कार्यालयले दिएको सिफारिस अनिवार्य गरिएको छ ।

यता, कोभिसिल्ड खोपको दोस्रो मात्रा लगाउन बाँकी रहेकालाई उच्च प्राथमिकतामा राखेर खोपको पहल भैरहेको स्वास्थ्य मन्त्रालयले बताए पनि खोप कहाँबाट ल्याउने भन्ने टुङ्गो अझै लागेको छैन । सरकारले खोप खरिदका लागि अमेरिका, चीन, रुस, डेनमार्क लगायत देशमा पहल गरे पनि खोप खरिदको टुङ्गो लागेको छैन । नेपालमा ६५ वर्षमाथिका १४ लाखभन्दा धेरै नागरिक कोभिसिल्डको दोस्रो डोजको पर्खाइमा रहेका छन् ।


क्याटेगोरी : देश / प्रदेश, शिक्षा / स्वास्थ्य
ट्याग : #breaking

तपाईको कमेन्ट लेख्नुहोस्