चाडपर्वमा घर जाने योजनामा हुनुहुन्छ, कोठा छाड्न लागेको जानकारि सामाजिक सञ्जालमा नराखौँ !

मिसन खबर ५ आश्विन २०७९, बुधबार २३:१२

काठमाडौं । काठमाडौं उपत्यका प्रहरीले चाडपर्वलक्षित विशेष सुरक्षा योजना आजबाट लागू गर्दै आफू कोठा छाडेर घर जान लागेको सूचना सामाजिक सञ्जालमा नराख्न आग्रह गरेको छ । प्रहरी परिसर काठमाडौंका प्रवक्ता दिनेशराज मैनालीले चाडपर्वलक्षित विशेष सुरक्षा योजना आजबाट लागू भएको जानकारि गराउँदै कोठा छाड्ने सूचना सार्वजनिक नगर्न आग्रह गरेका हुन ।

हरेक नागरिकले आफ्नो घर, भाडामा वा काममा बस्ने व्यक्तिको नाम, थर, स्थायी वतन र फोटोसहितको विवरण राख्नुपर्ने भन्दै प्रहरीले यस्ता विवरण राख्न सबैलाई अनुरोध समेत गरेको छ । प्रहरीले आफ्नो घर र टोलमा शङ्कास्पद व्यक्तिको गतिविधि देखिए तुरुन्त खबर गर्न पनि अनुरोध गरेको छ । घरको गेट, ढोकाको चुकल, कब्जा राम्रोसँग बन्द गर्न, लामो समयका लागि घर बाहिर जानुपरेमा विश्वासिलो छिमेकी वा नजिकको प्रहरीलाई जानकारी गर्न, सकेसम्म नगद, बहुमूल्य सामान र गरगहनाहरु घरमा नराख्न र दशैँ तिहारका लागि गाउँ जान लागेको जानकारी सामाजिक सञ्जालमा पोस्ट नगर्न प्रहरीले सबैलाई अनुरोध गरेको छ।

चाडपर्वमा पाकेटमार, चोरी, डकैती र लुटपाटका घटना धेरै हुने हुँदा बैंक वित्तीय संस्था, भिडभाड हुने ठाउँ, मेला लाग्ने ठाउँ र मठमन्दिर लगायतका भित्री क्षेत्रमा प्रहरीको सङ्ख्या बढाउने र चेक प्वाइन्टमा गस्ती खटाउन थालिएको छ । चोरी नियन्त्रणमा प्रहरीसँगै समूदाय र व्यक्तिको समेत भुमिका रहने भएकाले तपाई हामी सबै सचेत बन्नुपर्ने हुन्छ ।

क्याटेगोरी : जनचासो / सामाजिक सञ्जाल, देश / प्रदेश