सम्झौताका सर्त र कानुन मिच्ने अस्पताललाई कारबाही गर्ने स्वास्थ्यमन्त्री बस्नेतको चेतावनी !

मिसन खबर १९ जेष्ठ २०८०, शुक्रबार १६:२१

काठमाडौं । स्वास्थ्य तथा जनसंख्यामन्त्री मोहनबहादुर बस्नेतले विपन्न तथा आर्थिक अवस्था कमजोर भएका दश प्रतिशत नागरिकहरुको निःशुल्क उपचार नगर्ने अस्पताललाई कारबाही गर्ने चेतावनी दिएका छन् । शुक्रबार शहीद गंगालाल राष्ट्रिय हृदय केन्द्र र मेडिकेयर हस्पिटलको अनुगमनका क्रममा मन्त्री बस्नेतले विपन्न नागरिकलाई निःशुल्क उपचार गरेको विवरण माग्दै यस्तो चेतावनी दिएका हुन ।

अस्पताल सञ्चालनको स्वीकृति लिँदा गरेको सम्झौता अनुरुप १० प्रतिशत निःशुल्क उपचार गर्न निर्देशन दिर्नेशन दिदै स्वास्थ्य मन्त्री बस्नेतले भने, ‘जसले सम्झौता अनुसार सेवा दिएको छैन, कानूनी परिधिभित्र रहेर हामी कारबाही शुरु गर्छौं ।’ मन्त्री, सांसद वा नेताहले सिफारिस गर्दा बेड पाउने, नभए नपाउने अवस्थाको अन्त्य गर्ने समेत मन्त्री बस्नेतले विश्वास दिलाएका छन् । ‘मन्त्रीको सिफारिस भए पनि एउटै, सर्वसाधारणको भए पनि एउटै । सिफारिस पनि चाहिएन । खाली छ भने लाने, छैन भने लानु परेन’, वेडको विवरण समेत वेबसाइटमा राख्न निर्देशन दिदै स्वास्थ्यमन्त्री बस्नेतले भने, ‘वेबसाइटमा राखिएको कुरा झुटा सावित भयो भने त्यो हस्पिटल समेतलाई कारबाही गर्छौं ।’

मन्त्री बस्नेतले पत्रकार सम्मेलन समेतको आयोजना गरेर स्वास्थ्य क्षेत्रका सबै बिक्रिति अन्त्य गर्ने बताएका छन् । स्वास्थ्य क्षेत्रमा सल्बलाएका बिचौलियालाई रोक्न, उपचारका नाममा भैरहेको नीजि अस्पतालको मनोमानी र लुट विरुद्ध समेत आफू कठोर रुपमा अघि बढ्ने मन्त्री बस्नेतले बताएका छन् ।

क्याटेगोरी : जनचासो / सामाजिक सञ्जाल, जनप्रतिनिधि, देश / प्रदेश, शिक्षा / स्वास्थ्य