कटहरी बलात्कार प्रकरण : छोरी बलात्कार गरेको अभियोगमा बुबा पक्राउ, अनुसन्धानले लियो गति

मिसन खबर २२ फाल्गुन २०७५, बुधबार १७:१६

File

विराटनगर—प्रहरीले छोरी बलात्कारको आरोपमा मोरङबाट एक जनालाई पक्राउ गरेको छ । ८ वर्षकी बालिका बलात्कारको आरोपमा उनकै बुबालाई पक्राउ गरिएको हो ।

मोरङ कटहरी गाउँपालिका २ मा बस्दै आएका एक व्यक्तिले घरका सबै सदस्य छिमेकमा जन्मदिन मनाउन गएका बेला सुतिरहेकी छोरीलाई बलात्कार गरेको प्रहरीको आशंका छ । घटना बाहिरिएपछि भोलिपल्ट बालिकासहित परिवारका सबै सदस्य घर छाडेर सुनसरीको भाण्टाबारीस्थित आफन्तकोमा गएर बसेका थिए । भारत लगेर बालिकाको उपचार समेत गरेको आशंका सहित प्रहरीले घर फर्किएपछि बुबालाई पक्राउ गरेको हो । ११ औं दिनमा बालिकाको घरमा सोधपुछ गर्दा शंकास्पद देखिएपछि बुबालाई पक्राउ गरिएको प्रहरीले जानकारी दिएको छ ।

मोरङ प्रहरी प्रमुख मनोज केसीका अनुसार घटना शंकास्पद भएकाले बुबालाई नियन्त्रणमा लिएर थप अनुसन्धान अघि बढाइएको छ । स्वास्थ्य परीक्षणको रिपोर्ट आएपछि थप बिषय बाहिर आउने प्रहरीले जनाएको छ । कटहरी बलात्कार प्रकरणका स्थलगत प्रमाण नष्ट भएका कारण अनुसन्धान केही जटिल भएपनि सत्यतथ्य बाहिर ल्याइछाड्ने दाबी प्रहरीको छ ।

क्याटेगोरी : देश / प्रदेश, समाचार
ट्याग : #hot