नीति तथा कार्यक्रमको प्राथमिकता कोरोना रोकथाम, अतिक्रमित भुमि फिर्तादेखी आर्थिक पुनरुत्थान (पूर्णपाठ)

मिसन खबर ३ जेष्ठ २०७७, शनिबार ०१:३१

काठमाडौं । सरकारले आगामी आर्थिक वर्षको नीति तथा कार्यक्रम ल्याएको छ । संघीय संसदको दुबै सदनको संयुक्त बैठकमा राष्ट्रपति विद्यादेवी भण्डारीले प्रस्तुत गरेको नीति तथा कार्यक्रममा स्वास्थ्य, शिक्षा, रोजगारी र आर्थिक पुनरुत्थानमा केन्द्रित भएको बताइएको छ ।

नेपाल सरकारले अवलम्वन गरेको स्पष्ट रणनीतिका कारण नेपालभित्र सवैको जीवन रक्षा गर्न सफल भएको उल्लेख गर्दै नीति तथा कार्यक्रममा आगामी दिनमा अझ बढी सतर्कता र एकता आवश्यक रहनेमा जोड दिइएको छ । कोरोना महामारी नियन्त्रण र नागरिकको जीवन रक्षालाई प्राथमिकता दिएको नीति तथा कार्यक्रममा सरकारले कोरोनाबारे सुरुदेखि नै सतर्कता अपनाएको उल्लेख गर्दै सरकारी संयन्त्रमार्फत औषधि र खाद्य वस्तुको सहज आपूर्तिको व्यवस्था गरिएको दाबी गरिएको छ ।

सरकारले नीति तथा कार्यक्रम मार्फत आगामी आर्थिक वर्ष २०७७ ७८ भित्र भारतले अतिक्रमण गरेको लिम्पियाधुरा, लिपलेक र कालापानी क्षेत्रलाई फिर्ता ल्याउने घोषणा गरेको छ । वैदेशिक रोजगारीबाट फर्किएका दक्ष युवाहरुलाई उद्यमशील बन्नमका सुरुआती पुँजी उपलब्ध गराउने घोषणा गरेको सरकारले संघमा ३ सय शैय्या र सातै प्रदेशमा सुविधा सम्पन्न सरुवा रोग अस्पताल स्थापना गर्ने प्रस्ताव गरेको छ ।

नीति तथा कार्यक्रममा सरकारले दुई वर्षमा विद्युतीय माध्यमबाट मात्र रकमको लेनदने हुने व्यवस्था मिलाउने घोषणा गरेको छ । नीजि क्षेत्रको भुक्तानीलाई पनि विद्युतीय माध्यममा रुपान्तरण गरिने सरकारको लक्ष्य छ ।