मनसुनी वायु सक्रिय रहँदा देशभर सामान्य बदली सहित वर्षा, सतर्कता अपनाउन अपिल

मिसन खबर १० श्रावण २०७७, शनिबार १७:१०

काठमाडौं । मनसुनी वायु सक्रिय रहँदा अहिले मुलुकका विभिन्न स्थानमा सामान्य वर्षा भइरहेको छ । देशभर सामान्य बदली रही केही स्थानहरूमा हल्का वर्षा भइरहेको जल तथा मौसम पूर्वानुमान महाशाखाले जानकारी दिएको हो ।

बिहान र दिउँसो पनि सामान्य बदली रही बागमती प्रदेश, गण्डकी प्रदेश, प्रदेश ५ र सुदूरपश्चिम प्रदेशमा भारी वर्षा भएको थियो भने अहिले पनि वर्षा जारी रहेको बताइएको छ । मनसुनी न्यून चापीय रेखा पश्चिमी भू–भागमा नेपालबाट दक्षिण सरेको तथा पूर्वी भू–भागमा नेपाल नजिक रहेकाले भारी वर्षाको सम्भावना रहेको मौसमविदहरु बताउँछन् । राति समेत बागमती, प्रदेश १ का केही स्थानमा भारी वर्षाको पूर्वानुमान मौसमविद्हरुले गरेका छन् । देशभरका नदीमा पानीको बहाव बढ्ने, पहाडी क्षेत्रमा भू–क्षय हुने, पहिरो जाने, सडक तथा हवाई यातायात प्रभावित हुने तथा ढल र पानीको राम्रो निकास नभएको ठाउँमा डुबानसमेत हुन सक्ने भएकाले आवश्यक सतर्कता अपनाउन महाशाखाले सबैलाई आह्वान गरेको छ ।

आइतबार र सोमबार पनि देशका विभिन्न स्थानमा भारी वर्षाको पूर्वानुमान गरेको महाशाखाले आगामी तीन दिनसम्म सतर्कता अपनाउन सबैमाझ आग्रह गरेको छ ।