Techie IT
Mission Khabar

प्रधानमन्त्री ओली नैतिक संकटमा, गुहार्दै बामदेव


काठमाडौं । एकलौटी निर्णयमा चल्ने स्वभावका कारण नेकपा अध्यक्ष समेत रहेका प्रधानमन्त्री केपी शर्मा ओली पार्टीभित्रैबाट नैतिक संकटमा फसेका छन् । मंगलबार प्रधानमन्त्रीको सरकारी निवास बालुवाटारमै बसेको स्थायी कमिटीको बैठकले ओलीलाई ठाडो चुनौती दिँदै उनीविरुद्ध बहुमतले प्रस्ताव पारित गरेपछि नैतिक संकटमा परेका हुन् ।

मंगलबार बिहान ११ बजे आयोजित स्थायी कमिटीको बैठक एकलौटी रुपमा स्थगनको घोषणा गरेर प्रधानमन्त्री ओली आफू त सहभागी भएनन् नै, आफ्नो समूहका १४ नेताहरुलाई उपस्थित नहुन निर्देशन दिए । तर ४४ सदस्यीय स्थायी कमिटीका २९ जनामात्रै सहभागी भएर बैठक बस्यो । बैठकले स्थायी कमिटीको बैठक पार्टी अध्यक्ष केपी शर्मा ओलीले विधिविपरीत स्थगित भएको सूचना प्रसारित गर्नु उचित नभएको निष्कर्ष सहित पार्टीको एकता, विधि र परम्परालाई ध्यानमा राखी अर्का अध्यक्ष केपी शर्मा ओलीसँग छलफल गरी बैठक सुचारु गर्न पार्टी अध्यक्ष प्रचण्डलाई जिम्मेवारी दिने निर्णय गरेको छ । पार्टी एकताको रक्षा गर्न, पार्टीलाई विधि र पद्दतिसम्मत ढंगले अगाडि बढाउन र पार्टीको वर्तमान संकटललाई सकारात्मक ढंगले निकास दिन योगदान पुर्याउनका निम्ति पार्टीका सबै नेता कार्यकर्ता र सदस्यहरुलाई आआफ्नो ठाउँबाट भूमिका खेल्न पनि बैठकले आह्वान गरेको छ ।

ओली पक्षका स्थायी समिति सदस्य बिनाको बैठकमा प्रधानमन्त्री ओली बिरुद्ध चर्को रुपमा प्रस्तुत भएपनि नेता बामदेव गौतमले मध्यमार्गी ६ बुँदे सहमतीको खाका प्रस्तुत गरेका थिए । यसैले बहुमतको निर्णय भइरहँदा सहमतिका लागि भन्दै ६ बुदे प्रस्ताव पेश गरेका बामदेव गौतमलाई भेट्न प्रधानमन्त्री आफै साँझ भैंसेपाटी पुगेका थिए । बहुमत स्थायी समिति सदस्यले पार्टी बिधि बिधान अनुसार चल्नुपर्ने, ओलीको स्वेच्छाचारिता अन्य हुनुपर्ने पक्षमा देखिदा स्थायी कमिटी सदस्य एवं मन्त्री योगेश भट्टराईले सामाजिक सञ्जालमा दुर्घटना नजिक देखिन्छ सल्लाह गरौं भन्ने लेखेर नेकपामा बिवाद थप उग्र भएको संकेत गरेका छन् ।

ओली आफ्नै एकलकाटे स्वभावमा अडिग रहने र प्रचण्ड नेपाल गुट थप बलियो हुँदै जाने हो नेकपा भित्रको तिक्तता थप बढ्ने देखिन्छ । कतिपय राजनीतिक विश्लेषक त यो शक्ति संघर्षको द्धन्द्धले नेकपा फुटतर्फ उन्मुख हुने बताउँदै आएका छन् । विश्लेषक प्राडा सुरेन्द्र केसी भने स्वार्थ समुहको झुण्डका रुपमा विकास भएको नेकपा अवशर र स्वार्थमा चरम द्धन्द्ध पैद्धा नहुँदासम्म झगडाकै बीच अघि बढ्ने बताउँछन् । नेपाली दलहरुमा स्वार्थगत फुट र जुट सामान्य हुने उनको दाबी छ ।


क्याटेगोरी : जनप्रतिनिधि, देश / प्रदेश, समाचार
ट्याग : #breaking, #ओलीलाई चुनौती, #केपी शर्मा ओली, #नेकपा, #नेकपा फुटतर्फ उन्मुख, #नेकपा स्थायी कमिटी, #नैतिक संकटमा ओली, #प्रचण्ड-नेपाल

तपाईको कमेन्ट लेख्नुहोस्