सुन प्रतितोला लाख नजिक, १३ दिनमै ७ हजार महंगियो

मिसन खबर २० श्रावण २०७७, मंगलवार १२:५४

काठमाडौ । सुनको मूल्य प्रतितोला एक लाख रुपैयाँ नजिक पुगेको छ । नेपाल सुनचाँदी व्यवसायी महासंघका अनुसार मंगलबार छापावाल सुन तोलाको ९९ हजार ८ सय रुपैयाँमा कारोबार भइरहेको छ । सोमबार स्थिर रहेको सुनको मूल्य मंगलबार दुई सय रुपैयाँले बढेर ९९ हजार ८ सयमा कारोबार भएको हो ।

तेजाबी सुनको मूल्य तोलाको ९९ हजार ३६५ पुगेको छ । मूल्य स्थिर रहेको चाँदी तोलाको १२ सय ३० रुपैयाँमा कारोबार भइरहेको छ ।

१३ दिनमा ६ हजार ९ सय महंगियो

अघिल्लो दिनको तुलनामा प्रतितोला पाँच सय रुपैयाँ देखी प्रतितोला एक हजार तीन सय रुपैयाँसम्म सुनमा महंगि थपिएको छ । साउन ७ गते नेपाली बजारमा सुनको कारोबार अघिल्लो दिनको भन्दा एक हजार ३ सय रुपैयाँ बढेर प्रतितोला ९४ हजार रुपैयाँमा कारोबार भएको थियो।

१२ गते प्रतितोला १२ सय रुपैयाँले बढेर ९७ हजार ५ सय रुपैयाँमा कारोबार भएको सुन १३ गते प्रतितोला ७ सय रुपैयाँले बढेर ९८ हजार दुई सय रुपैयाँ, १४ गते प्रतितोला ३ सय रुपैयाँले बढेर ९८ हजार ५ सय रुपैयाँ, १५ गते प्रतितोला ५ सय रुपैयाँले बढेर ९९ हजार रुपैयाँ, १६ गते प्रतितोलामा ३ सय रुपैयाँले बढेर ९९ हजार ३ सय रुपैयाँ र १८ गते प्रतितोलामा ३ सय रुपैयाँले बढेर ९९ हजार ६ सय रुपैयाँमा कारोबार भएको थियो। १९ गते स्थितर रहेको मुल्य २० गते २०० बढेर ९९ हजार ८०० पुगेको छ ।