Techie IT
Mission Khabar

कोरोना संक्रमणबाट थप ४ को मृत्यु, साँढे २९ हजार संक्रमितमध्ये १३० ले ज्यान गुमाए


काठमाडौं । कोरोना संक्रमणका कारण आज विहान मात्रै थप चार जनाको मृत्यु भएको छ । योसँगै नेपालमा कोरोनाबाट ज्यान गुमाउनेको संख्या १ सय ३० पुगेको छ । काठमाडौंको पाटन अस्पतालमा उपचाररत दुई जना, बुटवलको कोरोना बिशेष अस्थाई अस्पतालमा उपचाररत एक जना र विराटनगरमा होम आइसोलेसनमा बसेका एक कोरोना संक्रमितको मृत्यु भएको हो ।

ललितपुरको पाटन अस्पतालमा उपचाररत दोलखा निवासी ३० वर्षीया महिला र सर्लाहीको मलंगवा निवासी ४६ वर्षीय पुरुषको आज बिहान मृत्यु भएको छ । यस्तै, कोरोना संक्रमण पुष्टि भएपछि अस्पताल अभावमा होमआइसोलेसनमा बसेका विराटनगर महानगरपालिका–६ सरोचियाका का ४५ वर्षीय पुरुषको समेत मृत्यु भएको छ । बुटवलको कोरोना विशेष अस्थायी अस्पतालमा उपचाररत प्यूठानको स्वर्गद्वारी नगरपालिका–७ सोत्रेका ६४ वर्षीया पुरुषको शुक्रबार बिहान मृत्यु भएको छ ।

कोरोना संक्रमणसँग मिल्दोजुल्दो लक्षण भएका रौतहटका एक जना पुरूषको उपचारको क्रममा वीरगञ्जमा मृत्यु भएको छ । ज्वरो, खोकी, पखाला र श्वासप्रश्वासमा समस्या देखिएपछि शिवदर्शन सेन्ट्रल अस्पताल रौतहटबाट वीरगञ्ज रिफर गरिएका उनको मृत्युपछि स्वाबको नमुना संकलन गरिएको छ । यस्तै, चार दिनदेखि उच्च ज्वरो आएपछि उपचार गर्न धरान जाने तयारी गर्दागर्दै सप्तरीको डाक्नेश्वरी नगरपालिका वडा नम्बर ८ निवासी ३२ वर्षीया महिलाको मृत्यु भएको छ । कोरोनाको आशंका सहित स्वाब संकलन गरेर परिक्षण गरिएको नगरपालिकाले जनाएको छ ।

जोखिम र उपचार
बढी जनघनत्व भएका शहरहरुमा देखिएको संक्रमण र मृत्यु दरले यहि अनुपातमा कोरोना महामारी विस्तार भएमा नेपालको स्वास्थ्य प्रणाली नै प्रभावित हुने देखिएको छ । बिहिबार साँझसम्म मात्रै आइसीयू र भेन्टिलेटरमा उपचाररत बिरामीको संख्या १३६ थियो । कोरोना संक्रमणका लागि छुट्याइएका ९४७ आईसीयू र ४ सय ९७ भेन्टिलेटरले नधान्ने आँकलन गरेको सरकारले निजी अस्पताललाई समेत सिट संख्याको २० प्रतिशत बेड कोरोना उपचारमा छुट्याउन आग्रह गर्दै आएको छ ।

नेपालमा कोरोना संक्रमितको संख्या २९ हजार ६ सय ४५ पुगेको छ भने कोरोना संक्रमणबाट ज्यान गुमाउनेको संख्या १ सय ३० पुगेको छ ।


क्याटेगोरी : देश / प्रदेश, शिक्षा / स्वास्थ्य

तपाईको कमेन्ट लेख्नुहोस्