Techie IT
Mission Khabar

कोरोना रोकथाममा करिब साँढे १३ अर्ब खर्च, अझै कायमै पारदर्शिताको प्रश्न


काठमाडौं । कोरोना भाइरस संक्रमणको रोकथाम तथा नियन्त्रणमा सरकारले १३ अर्ब ३६ करोड रुपैयाँ खर्च गरेको छ । संघीय सरकार, प्रदेश सरकार र स्थानीय तहले समेत साउन मसान्तसम्ममा यो रकम खर्च गरेका हुन् ।

सरकारका प्रवक्ता डाक्टर युवराज खतिवडाका अनुसार संघीय सरकारका तर्फबाट ५ अर्ब ८५ करोड, प्रदेश सरकारको तर्फबाट १ अर्ब ३ करोड र स्थानीय तहहरुबाट ६ अर्ब २ करोड रुपैयाँ खर्च भएको छ । संघीय सरकारले खर्च गरेको रकम मध्ये स्वास्थ्य तथा जनसंख्या मन्त्रालयले २ अर्ब १७ करोड, रक्षा मन्त्रालयले २ अर्ब ३७ करोड, गृह मन्त्रालयले २० करोड ८३ लाख, परराष्ट्र मन्त्रालयबाट ६ लाख, संस्कृति, पर्यटन तथा नागरिक उड्डयन मन्त्रालयबाट ४ करोड ४९ लाख, शहरी विकास मन्त्रालयबाट १ करोड, कोरोना कोषबाट १ अर्ब ३ करोड रुपैयाँ खर्च भएको छ । संघीय सरकार अन्तर्गत सबैभन्दा बढी रक्षा मन्त्रालयबाट खर्च भएको छ ।

प्रदेशहरुले गरेको खर्चमध्ये प्रदेश १ ले २० करोड ७१ लाख, प्रदेश २ ले १७ करोड २ लाख, बागमती प्रदेशले १३ करोड ६७ लाख, गण्डकी प्रदेशले १४ करोड ५४ लाख, प्रदेश ५ ले १० करोड ५९ लाख, कर्णाली प्रदेशले २६ करोड २६ लाख र सुदूरपश्चिम प्रदेशले ४२ करोड ४८ लाख खर्च गरेका सरकारी तथ्यांक छ । स्थानीय तहबाट ६ अर्ब २ करोड रुपैयाँ खर्च भएको सरकारी आँकडा छ ।

औषधि र स्वास्थ्य सामाग्री, स्वास्थ्य पूर्वाधार, जनशक्ति परिचालन, क्वारेन्टिन र अन्य क्षेत्रमा खर्च भएको उल्लेख गरिएको छ । हालसम्म नेपाल सरकारले खोलेको कोरोना संक्रमण रोकथाम तथा नियन्त्रण कोषमा २ अर्ब ७५ करोड रुपैयाँ जम्मा भएकोमा यसबाट १ अर्ब २० करोड रुपैयाँ खर्च भएको जनाइएको छ ।

सरकारले कोरोना रोकथामका लागि गरेको खर्च पारदर्शी नभएको भन्दै सदनदेखी सडकसम्मै आवाज उठेको छ । तर सरकारले मन्त्रालय, प्रदेश र स्थानीय तहको भनेर एकमुष्ठ रुपमा खर्च विवरण सार्वजनिक गर्ने परम्परालाई नै निरन्तरता दिइरहेको छ । कुन शिर्षकमा क–कस्ले कति खर्च गरे भन्ने विषयगत विवरण सार्वजनिक नगरिदासम्म सरकारको खर्चमा उठ्ने पारदर्शिताको प्रश्न यथावत रहने देखिन्छ ।


क्याटेगोरी : अर्थ / रोजगार, जनचासो / सामाजिक सञ्जाल, देश / प्रदेश
ट्याग : #breaking, #hot, #कोरोना भाइरस, #कोरोना रोकथाम, #कोरोना रोकथामका लागि गरेको खर्च, #कोरोना संक्रमण रोकथाम तथा नियन्त्रण कोष, #नेपाल सरकार, #प्रदेश, #प्रदेश सरकार, #संघीय सरकार, #स्थानीय तह, #स्वास्थ्य तथा जनसंख्या मन्त्रालय

तपाईको कमेन्ट लेख्नुहोस्