थपिदै संक्रमित र जोखिम, झन झन खुकुलो बन्दै काठमाडौं उपत्यका

मिसन खबर १ आश्विन २०७७, बिहीबार ०६:१९

काठमाडौं । कोरोना संक्रमितको संख्या दिनहु बढ्दो क्रममा देखिएपनि काठमाडौँ उपत्यकामा लगाइएको निषेधाज्ञा अझ खुकुलो बनाइएको छ । उपत्यकाका तीन वटै जिल्ला प्रशासन कार्यालयहरूले भदौ २४ बाट खुकलो बनाएको निषेधाज्ञा असोज एक बाट थप खुकुलो बनाइएको हो ।

काठमाडौं उपत्यका प्रशासनले यातायातमा जोर बिजोर प्रणालीलाई यथावत राख्दै ब्यवसाय खोल्न तोकिएको बारको प्रतिबन्ध हटाएको छ । काठमाडौंका प्रमुख जिल्ला अधिकारी जनकराज दाहालका अनुसार बुधबारदेखि अर्को आदेश नभएसम्मका व्यवसाय खोल्न तोकिएको बारको ब्यवस्था हटाइएको छ । यसअघि २४ भदौमा काठमाडौं उपत्यकाभित्र बार अनुसार व्यापार तथा व्यवसाय सञ्चालन गर्न छुट दिइएको थियो ।

मठमन्दिर, मस्जिद, चर्च लगायतका धार्मिक तथा सांस्कृतिक स्थलमा नृत्य पुजाबाहेकका गतिविधि सञ्चालनमा लगाइएको रोकावट भने यथावत नै छ । बढी भिडभाड हुने उद्योग, व्यवसाय अन्तरगतका स्वास्थ्य मापदण्ड विपरित हुने क्रियाकलापहरु गर्न, चाडपर्व लगायतका धार्मिक, सामाजिक र सांस्कृतिक कार्य गर्दा जमघट गर्न र शैक्षिक संस्था सञ्चालन गर्न भने अझै छुट दिइएको छैन । सेमिनार गोष्ठी, तालिम, सिनेमा हल, पार्टी प्यालेस, शैलुन, स्पा, स्मिमिङ पुल, जिमखानासहित भीडभाड हुने क्षेत्रमा भने प्रतिबन्ध अझै कायमै छ ।

काठमाडौंको सार्वजनिक यातायातमा लागू गरिएको जोरबिजोर प्रणाली भने यथावत नै राखिएको छ ।

यस्तो छ प्रशासनले जारी गरेको निषेध आदेश