जापानमा बढ्दै बेरोजगारी समस्या, तीन वर्ष यताकै उच्च

मिसन खबर १७ आश्विन २०७७, शनिबार ०९:२०

सुनिता/सुर्य अधिकारी, फुकोउका । कोरोना महामारिका कारण जापानको बेरोजगारी दर तीन वर्ष यताकै उच्च बिन्दुमा पुगेको छ । कोरोना भाइरसको महामारी नियन्त्रणका लागि भन्दै लगाइएका विभिन्न प्रतिबन्ध पछि अर्थतन्त्र कमजोर बनेर जापानमा बेरोजगार दर बढेको हो ।

जापानको आन्तरिक मामिला र सञ्चार मन्त्रालयका अनुसार देशको बेरोजगारी दर लगातार दोस्रो महिना पनि बढेको छ । जुलाईमा बेरोजगार दर २ दशमलब ९ प्रतिशत रहेकोमा अगस्टमा बढेर तीन प्रतिशत पुगेको छ । जापानमा अगस्टमा बेरोजगार दर तीन प्रतिशत पुगेको शुक्रबार सार्वजनिक तथ्याङ्कमा उल्लेख छ । तथ्याङ्क विभागका अनुसार सन् २०१७ को मे महिनाको तुलनामा जापानमा बेरोजगार दर ३ दशमलब १ प्रतिशतले बढेको हो । गत वर्षभन्दा यो वर्ष जापानमा चार लाख ९० हजार बढी व्यक्ति बेरोजगार भएका छन् ।

समग्रमा २६ लाख व्यक्ति बेरोजगार बनेका सरकारी तथ्यांक छ । जापानको श्रम मन्त्रालयका अनुसार अगस्टमा रोजगार उपलब्धता दरमा लगातार आठौँ महिना पनि कमी देखिएको छ । जापानमा सन् २०१४ को जनवरीपछि पहिलो पटक बेरोजगारी समस्या उच्च देखिएको हो ।