Techie IT
Mission Khabar

कोरोना कहर : महामारी रोकथाम भन्दा पार्टी र व्यक्तिगत स्वार्थमा रमाउँदै नेताहरु

सरकारको रोकथाम प्रयास समेत निरर्थक


काठमाडौं । कोरोना महामारीबाट यतिबेला विश्व समुदाय आजित बनेको छ । यो समाचार तयार पार्दासम्म विश्वभर ३ करोड ७७ लाख ५४ हजार ४ सय ६४ जना कोरोना संक्रमित बन्दा १० लाख ८१ हजार ५ सयले ज्यान गुमाएका छन् । अझ पनि ८३ लाख भन्दा बढी सक्रिय संक्रमित छन् ।

पछिल्लो समय उच्चदरमा संक्रमण र मृत्युदर देखिएको नेपाल समेत यतिबेला विश्वको ४० औँ प्रभावित मुलुक बनेको छ । यहाँ १ लाख ७ हजार ७५५ संक्रमित पहिचान हुँदा ६ सय ३६ जनाले कोरोनाबाट ज्यान गुमाएका छन् । नेपालमा यो समाचार तयार पार्दासम्म ३१ हजार ३ सय १५ जना सक्रिय संक्रमित रहेका छन् । कतिपय देशमा संक्रमण रोकथाममा सरकार र दलका नेताहरुले प्रभावकारी भूमिका खेलेपनि नेपालको हकमा भने नागरिकसँगै राजनीतिक दल र सरकार नै बेमतलबी देखिएका छन् । संक्रमण र मृत्युदर उच्च देखिदा भेन्टिलेटर अनि आईसियू मात्रै नभएर सामान्य आइसोलेसन समेत नपाउने अवस्था आएको छ । लकडाउन र त्यसपछिको निषेधाज्ञाका विच मौलाएको राजनीतिक गतिविधिले कोरोना संक्रमणलाई विस्तार गरेको छ ।

राजनीतिक दल र तीनका नेताहरुमा कोरोना संक्रमण पहिचान भएपछि राजनीतिक गतिबिधि कम हुन थालेपनि यसअघिका गतिबिधिले भने नेताहरुले कोरोना रोकथामका मापदण्ड पुरा नगरेपनि हुने हो की भन्ने देखाएको छ । कोरोना महामारीको समयमा देशका विभिन्न स्थानमा चलेका राजनीतिक गतिबिधि र भीडभाड जम्मा गरेर गरिएका यी पार्टी प्रवेश कार्यक्रमका केही तस्वीर हेरौँ ।

गत फागुन अन्तिम साता कोरोना संक्रमण पहिचान भएको नेपालमा ६ महिनामै लाख बढी संक्रमित बनेका छन् । संक्रमण दर र मृत्यु दर निरन्तर बढिरहेको छ । तर योबीचमा सत्तारुढ दल नेपाल कम्युनिष्ट पार्टी नेकपासँगै प्रमुख प्रतिपक्षी दलका नेताहरु भने कोरोना रोकथाम तथा नियन्त्रणमा गम्भिर बन्न सकेका छैनन् । भारतले वैशाख २६ गते नेपाली भूमि हुँदै मानसरोवर जाने सडकको उद्घाटन गरेपछि नेपालको नक्सा तत्कालै जारी गर्नेमा सबै राजनीतिक दल एक ठाँउमा उभिएका थिए । लकडाउन घोषणाका बेला कोरोनामा पनि यस्तै राष्ट्रिय सहमति जस्तो देखिए पनि लकडाउन बढ्दै गएपछि राजनीतिक दल आरोप प्रत्यारोपमा उत्रिए ।

अझ अर्थतन्त्र बचाउने नाममा सबै क्षेत्र खुला गरिएपछि त आम सर्वसाधारण जस्तै जिम्मेवार बन्नुपर्ने दलका नेताहरु समेत स्वास्थ्य मापदण्ड बिपरितका गतिबिधिमा सक्रिय देखिएका छन् । कहिले प्रधामन्त्रीको केपी शर्मा ओलीको कुसी बचाउने आन्दोलन त कहिले पीसीआरको दायरा बढाउने दबाबका आन्दोलन । अनि कहिले कुलमान घिसिङ र गोबिन्द केसीको पक्षमा आन्दोलन । अझ पछिल्लो समय महिला हिंसा तथा बलात्कार बिरुद्धका आन्दोलन । यसरी गरिएका भीडभाड र राजनीतिक स्वार्थका गतिबिधिले कोरोना रोकथाम नभई विस्तार भएको छ । जनतालाई स्वास्थ्य मापदण्ड र अनुशासन सिकाउनुपर्ने दलहरु नै राजनीतिक गतिबिधिमा व्यस्त देखिदा कोरोना रोकथाममा बेवास्था बढिरहेको छ । यता, लामो समयको बन्दाबन्दी र रोजगारी खोसिएर मारमा परेका मजदुर तथा विपन्नहरुको गाँस र जीवन रक्षाको चिन्ता सरकार, सत्तारुढ दल र प्रमुख प्रतिपक्षी दलमा देखिएको छैन । महाधिबेशन तथा आन्तरिक किचलो व्यवस्थापनका नाममा बैठक अनि भेलामा व्यस्त देखिएका कुनैपनि दलले कोरोना रोकथाम तथा विपन्नहरुको भोजनका बारे कसरी व्यवस्थापन गर्ने भन्ने छलफल कहिल्यै चलाएनन् ।

सामाजिक अभियन्ताहरुले बरु रत्नपार्क, पाशुपत क्षेत्र, ललितपुर लगायतका विभिन्न स्थानमा रोजगारी र गास खोजिएकाहरुलाई खाना खुवाउदा समेत सरकार जनताको पीडामा बेमतलबी देखियो । प्रमुख प्रतिपक्षी दल नेपाली कांग्रेस, जनता समाजवादी पार्टी, राप्रपा समेत जनताको सबालमा, कोरोना रोकथामलाई प्रभावकारी बनाउनेगरी सत्तारुढ दल र सरकारलाई दबाब दिन कहिल्यै पनि गम्भिर देखिएनन । बरु कोरोना कहरकै बीच भेटघाट, पार्टी प्रवेश लगायतका राजनीतिक गतिबिधिले निरन्तरता पाउँदा आईसीयू र भेन्टिलेटर मात्रै होइन, सामान्य आइसोलेसन समेतको अभावमा घरमै कोरोना संक्रमणसँग नागरिकले लड्नुपर्ने समय आएको छ ।

शक्ति राष्ट्रलाई समेत आच्छुआच्छु बनाएको कोरोनामाथी फगतको गफ गरेर समय खेर फल्ने की सबै दल र सरकारबीचको एकताबाट देश अनि जनता बचाउनेगरि निकास खोज्न गम्भिर बन्ने ? आम जनताले राजनीतिक दलका नेता र सरकारसँग यस्तै प्रश्न गरिरहेका छन् । आइसीयू र भेन्टिलेटर नपाएर विरामीलाई अस्पताल चाहार्दा चाहार्दै ज्यान गुमाउने अवस्था सिर्जना भइसकेको छ ।


क्याटेगोरी : जनचासो / सामाजिक सञ्जाल, जनप्रतिनिधि, देश / प्रदेश, राजनीति, समाचार
ट्याग : #breaking

तपाईको कमेन्ट लेख्नुहोस्