Techie IT
Mission Khabar

एमालेमा दुई समानान्तर कमिटि, प्रधानमन्त्री एवं अध्यक्ष ओली मुख्य दोषी


खबर विश्लेषण, काठमाडौं । संविधानमा नभएको अधिकार प्रयोग गरेर प्रतिनिधि सभा भंग गराएका प्रधानमन्त्री केपी शर्मा ओली संबैधानिक इजलासको फैशलाबाट पुनस्र्थापना भएको त्यही संसदमा समेत नैतिकता भुलेर पैठेजोरी खेल्न खोजिरहेका छन् । यति मात्रै नभएर तात्कालिन नेकपामा रहँदा समेत बिधि, पद्धती र पार्टी विधान कुल्चिदै एकलौटी अघि बढेका उनी अदालतको फैशलाबाट नेकपा एमाले ब्युतिएपछि समेत बिधि, पद्धती कुल्चिएर एकलौँटी गर्न उद्धत छन ।

शुक्रबार ओलीले आफू निकट नेताहरुको बैठक मार्फत बाधा अड्काउ फुकाउमा टेकेर विधान संशोधन गर्दै महासचिव ईश्वर पोखरेल बाहेकका महाधिवेशनबाट निर्वाचित पदाधिकारी हटाएका थिए । उमेर हद, कमिटीको संरचनामा संशोधन गर्दै २०७८ मंसिर २ देखि ६ गतेसम्म दशौं महाधिवेशन गर्ने निर्णय गरेका ओलीले आफ्नो गुटको बालुवाटार बैठकलाई केन्द्रीय कमिटीको ‘विशेष बैठक’ भनेका छन् । जुन बैठकमा झलनाथ खनाल र माधवकुमार नेपाल निकट नेताहरुलाई बोलाइएन् । यसले आफू बिरोधी विरुद्ध निषेधको राजनीतिमा ओली अग्रसर छन भन्ने देखाएको छ ।

नेपाल समूहका नेताहरुको जिम्मेवारी खोसियो
प्रदेश १ को इन्चार्जमा भीम आचार्यलाई हटाएर सुवासचन्द्र नेम्वाङ, प्रदेश २ बाग्मती प्रदेशको इन्चार्जमा अष्टलक्ष्मी शाक्यलाई हटाएर रामबहादुर थापा बादल, कर्णाली प्रदेशको इन्चार्जमा युवराज ज्ञवालीलाई हटाएर यमलाल कँडेल र सुदूरपश्चिमम प्रदेशको इन्चार्जमा भीम रावललाई हटाएर लेखराज भट्टलाई दिइएको छ । प्रदेश २ को इन्चार्जमा सत्यनारायण मण्डल, गण्डकीमा पृथ्वीसुब्बा गुरुङ र लुम्बिनी प्रदेशको इन्चार्जमा शंकर पोखरेल ओली पक्षकै भएकाले कायमै छन् ।

स्कुल विभाग प्रमुख आफैंसँग राखेका ओलीले विदेश विभाग प्रमुखबाट माधवकुमार नेपाललाई हटाएर आफ्ना परराष्ट्र मामिला सल्लाहकार राजन भट्टराईलाई जिम्मेवारी सुम्पेका छन् । संगठन विभाग प्रमुखमा विष्णु पौडेल, संसदीय विभाग प्रमुखमा सुवासचन्द्र नेम्वाङ, निर्वाचन विभाग प्रमुखमा विष्णु रिमाल र सम्पर्क कमिटी तथा आार्थिक विभाग प्रमुखमा छविलाल विश्वकर्मालाई ल्याइएको छ । यस्तै माओवादी केन्द्रबाट एमालेमा समाहित भएको बादल समूहका २३ जनालाई एमाले केन्द्रीय सदस्यमा मनोनित गरिएको छ । केन्द्रीय कमिटीको विशेष बैठक भनिएको यो बैठकको निर्णयलाई ७ चैतमा बस्ने केन्द्रीय कमिटी बैठकले अनुमोदन गर्ने ओली पक्षीय नेताहरुको तयारी छ ।

नेपाल लगायत एक दर्जन नेतामाथी अनुशासन कारबाहीको तयारी
ओली नेपाललगायत झण्डै एक दर्जन नेतालाई अनुशासनको कारबाही गर्ने तयारीमा जुटेपनि तत्कालन नगर्न अधिकांश नेताले सुझाब दिएसँगै पछि हटेका थिए । नेपाल समूहले पार्टी अनुशासन उल्लंघन गरि गुटबन्दी गर्दै हिँडेको, सरकार गिराउन तानाबाना बुनिरहेको जस्ता आरोप ओली पक्षको छ । नेपाल पक्षको थप कदम हेरेर अनुशासनको कारबाही अघि बढाउन नेताहरुले सुझाब दिएका थिए ।

नेपाल पक्षको समानान्तर कमिटि
अध्यक्ष ओलीले आफू पक्षीय नेताहरुलाई पदच्युत गर्दै कमिटीहरु विस्तार गरेपछि माधव नेपाल पक्षले काउन्टर दिदै समानान्तर कमिटी विस्तार गरेको छ । जसअनुसार प्रदेश १ को संयोजनको जिम्मा भीम आचार्यलाई, प्रदेश २ को घनश्याम भुसाललाई, प्रदेश ३ को अष्टलक्ष्मी शाक्यलाई, प्रदेश ४ को जिम्मा सुरेन्द्र पाण्डेलाई, ५ र ६ को जिम्मा युवराज ज्ञवालीलाई र प्रदेश ७ को जिम्मा भीम रावललाई दिइएको छ । त्यस्तै, युवा विभागको जिम्मा रघु पन्त, विद्यार्थी विभागको जिम्मा गोकर्ण विष्ट, प्रचार विभागको जिम्मा योगेश भट्टराई, महिला विभागको जिम्मा अष्टलक्ष्मी शाक्यलाई र बुद्धिजीवी विभागको जिम्मा प्रमेश हमाललाई दिइएको छ ।

तटस्थ देखिएका नेताहरु समेत अध्यक्ष ओलीको बिरोधमा
पुनःस्थापित नेकपा एमालेका नेता वामदेव गौतम प्रधानमन्त्री ओलीको पछिल्लो कदमबाट रुष्ट बनेका छन् । पार्टी र नेतालाई एकताबद्ध बनाउन नचाहेर एकलौँटी रुपमा अघि बढेका ओलीसँग मिल्ने सम्भावना समाप्त भएको नेता गौतमले प्रतिक्रिया दिएका छन् । यस्तै, नेता प्रदीप नेपालले अध्यक्ष एवम् प्रधानमन्त्री ओली एमाले सिध्याउनेतिर अगाडि बढेको बताए । जनताको बहुदलीय जनवादको ठीक उल्टो, निरंकुश भएर ओली अघि बढेको नेपालको आरोप छ ।

एमालेलाई एकढिक्का बनाउने दायित्वबाट अध्यक्ष ओली बिमुख बन्दा झलनाथ खनाल, माधव नेपाल पक्षका नेताहरुले अपमान सहनुपर्दा अब एमाले एउटै हुने सम्भावना न्यून देखिएको छ । ओलीको एकलौँटी कदम लगत्तै इतर समूहले पनि केन्द्रीय कमिटी सदस्य र सांसदहरुको बैठक बोलाएर समानान्तर गतिबिधि अघि बढाउदा एमाले कमजोर हुने चिन्तामा नेताहरु देखिएका छन् ।


क्याटेगोरी : जनचासो / सामाजिक सञ्जाल, जनप्रतिनिधि, देश / प्रदेश
ट्याग : #breaking

तपाईको कमेन्ट लेख्नुहोस्