अब त्रिभुवन विश्वविद्यालयका विद्यार्थीले सीसी क्यामेराको निगरानीमा परीक्षा दिनुपर्ने

मिसन खबर २० फाल्गुन २०७७, बिहीबार १८:०८

काठमाडौं । त्रिभुवन विश्वविद्यालयले आफ्नो परीक्षा केन्द्रमा सीसी क्यामेरा राख्ने निर्णय गरेको छ । वार्षिक परीक्षा प्रणाली अनुसारका परीक्षा केन्द्रमा चैत २० गतेभित्र सीसी क्यामेरा जडान गर्न त्रिविको परीक्षा नियन्त्रण कार्यालयले निर्देशन दिएसँगै अब सीसी क्यामेराको निगरानीमा बसेर परिक्षा दिनुपर्ने भएको हो ।

परीक्षा नियन्त्रण कार्यालय निर्देशन जारी गर्दै सीसी क्यामेरा जडान नगर्ने परीक्षा केन्द्रलाई आगामी दिनमा परीक्षा सञ्चालन गर्न नदिने चेतावनीसमेत दिएको छ । सीसी क्यामेरामा परीक्षा सञ्चालन कक्ष, उत्तरपुस्तिका शीलबन्दी गर्ने कक्ष र प्रवेवशद्वारको सम्पूर्ण दृश्य देखिनुपर्ने र कम्तीमा डेढ महिनासम्म रेकर्ड राख्नेगरि पूर्वाधार तयार गर्नुपर्ने छ ।

परीक्षा नियन्त्रण कार्यालयले नियमित परीक्षालाई विश्वसनीय, मर्यादित तथा व्यवस्थित बनाउने उद्देश्यले परीक्षा केन्द्रमा सीसी क्यामेरा जडान गर्न लागिएको जानकारी दिएको छ ।