षडानन्द पाठशाला : इतिहास संरक्षणमा बढ्दै गरेको बेवास्ताको एउटा नमुना (फोटो डायरी)

मिसन खबर १७ कार्तिक २०७५, शनिबार १६:१०

शिक्षाका ज्योति मानिने आवाल ब्रह्मचारी षडानन्द अधिकारीले स्थापना गरेको सस्कृत पाठशाला संरक्षणको अभावमा जिर्ण बनेको छ । २०७२ बैशाख १२ को भुकम्पले क्षति पुर्याएको पाठशाला संरक्षणमा कसैले ध्यान नदिदा इतिहास मेटिने खतरा बढेको छ ।

जनस्तरबाट स्थापना भएको नेपालकै पहिलो संस्कृत पाठशाला हो भोजपुरको षडानन्द नगरपालिकामा रहेको पाठशाला । षडानन्दले १९३२ सालमा स्थापना गरेको पाठशालामा तत्कालीन समयमा पश्चिम नेपालका गुल्मी, सल्यान, प्यूठानसम्म र छिमेकी देश भारतको सिक्किम तथा आसामबाट विद्यार्थी गुरुकुल शिक्षा लिन आउने गर्थे ।

शिक्षाको यति ठूलो महत्व बोकेको पाठशाला अहिले खण्डहर जस्तै बनेको छ । पाठशाला संरक्षणको लागि पडानन्द सीताराम गुठी स्थापना गरिएपनि कुनै पहल भएको छैन ।

स्थानीय गुठीमा करिव २ सय रोपनी जमिन भएपनि पाठशालाको लागि केहि सहयोग नमिलेको बताउँछन् । पाठशाला परिसरमा रहेको राम मन्दिर, सिव लिङ्ग लगायतका मुर्तीहरु समेत तोडफोड भएका छन् । गुठी परिसरमा रामचन्द्र, नर्मदेश्वर, शिवालय र पशुपतिका ४ वटा मन्दिर जीर्ण छन् ।

वटुकहरुको लागि खाने तथा वस्ने व्यवस्था सहितको छात्रावास जीर्ण वनेको छ । अहिले ज्ञान आर्जन गरिरहेका वटुकलाई खान वस्न समस्या पर्दै आएको शिक्षक भिमचन्द्र नेपालले बताए ।

षडानन्द नगरपालिका भने पाठशालाको संरक्षणका लागि काम भैरहेको बताउछ । भोजपुरसँगै देशको चिनारी वोकेको यो पाठशाला राज्यको सम्पति हो । इतिहास संरक्षणमा स्थानीयसँगै सरकारले विशेष चासो लिनुपर्छ ।