पाशुपत क्षेत्रबाट यात्रा गर्दै हुनुहुन्छ ? महाशिवरात्रिको नयाँ ट्राफिक रुट बारे जानकार हुनुहोस्

मिसन खबर २० फाल्गुन २०७५, सोमबार ०८:२८

काठमाडौं– तपाई पाशुपत क्षेत्रको रुट भएर यात्रा गर्दै हुनुहुन्छ भने एक पटक ट्राफिक अपिल वा महाशिवरात्रिका लागि गरिएको यो परिवर्तित ट्राफिक व्यवस्थापनलाई ख्याल गर्नुहोस् । महानगरीय ट्राफिक प्रहरी महाशाखाले महाशिवरात्रि पर्वलाई ध्यानमा राखेर गौशला क्षेत्रमा सवारी प्रवेशलाई निषेध गरेको छ ।

ट्राफिक प्रहरी महाशाखाका प्रमुख एवं प्रहरी बरिष्ठ उपरीक्षक वसन्त पन्तका अनुसार चाबहिलबाट गौशाला, पुरानो बानेश्वरबाट गौशाला, रातोपुलबाट गौशाला, द्धारिका होटलबाट गौशाला, सिफलबाट जयबागेश्वरी, लामापोखरी कुटुबहाल हुँदै मित्रपार्क, गौरीघाटबाट मित्रपार्क, तिलगङ्गाबाट गौशालाका सवारीसाधनलाई प्रवेश निषेध गरिएको छ । दर्शनार्थी र विदेशी पर्यटकलाई वाइसिएल मार्ग, कोषका सवारीसाधन र संस्थानका सवारीसाधनलाई देवउद्यानस्थित कोषको कार्यालय, स्थानीय दर्शनार्थीलाई सिफलचौर र बाग्मती कोरिडोर र जोरपाटीबाट चावहिल हुँदै आउने सवारीसाधनलाई गुहेश्वरी पारी पार्किङको व्यवस्था मिलाइको छ ।

पुरानो बसपार्क–सिंहदरबार–नयाँ बानेश्वर–तीनकुने हुँदै गौशाला चल्ने सवारीसाधनलाई सोही रुट फिर्ता, पुरानो बसपार्क, जमल, लाजिम्पाट, नारायणगोपाल चोक, चाबहिल हुँदैँ साँखुसम्म जाने व्यवस्था मिलाइएको छ। कालोपुल हुँदै कपन चल्ने सवारीसाधनलाई लाजिम्पाटबाट महाराजगञ्ज जाने व्यवस्था मिलाइएको छ । यता, सुन्धाराबाट मैतीदेवी, पुरानो बानेश्वर हुँदै बौद्धसम्म चल्ने माइक्रोबस तथा टेम्पोलाई कृष्णपाउरोटी–नक्साल–चावहिल हुँदै बौद्धसम्म, जोरपाटीबाट सुन्धारा आउने माइक्रोबसलाई नारायणगोपालचोक हुँदै सुन्धारातर्फ जाने व्यवस्था गरिएको छ ।

पास भएका सवारीसाधनलाई नक्साल, भगवतीबहाल, सानो गौचरण, कालोपुल हुँदै सिफल आउने र फर्कदा सिफल, चाबहिल गणेशस्थान हुँदै चाबहिल निस्कने गरी नयाँ रुट व्यवस्थापन गरिएको छ । शिवरात्रिमा ट्राफिक व्यवस्थापनलाई चुस्त बनाउन विभिन्न स्थानमा ५ सय ८२ ट्राफिक प्रहरी परिचालन गरिएका छन् ।