फेरी क्रिकेटर लामिछानेको पुनरावेदन सुनुवाई स्थगित, कारण यस्तो

मिसन खबर २१ पुष २०७९, बिहीबार १७:३०

काठमाडौं । नाबालिग बलात्कारको आरोपमा पुर्पक्षका लागि थुनामा रहेर मुद्दा लडिरहेका राष्ट्रिय टिमका पूर्वकप्तान सन्दीप लामिछानेको पुनरावेदन पेसीमाथी आज पनि सुनुवाई भएन । बारम्बार पेशी तोकेर स्थगन हुँदै आएको मुद्धामा आजको सुनुवाई पनि स्थगन भएको हो ।

सुनुवाइका लागि पाटन उच्च अदालतमा राज्यलक्ष्मी बज्राचार्य र नरिश्वर भण्डारीको संयुक्त इजलास तोकिएपनि सन्दीपकै कानून व्यवसायीले पेशी स्थगित गरेको बताइएको छ । आफूलाई पुर्पक्षका लागि थुनामा पठाउने आदेशविरुद्ध सन्दीपले गरेको पुनरावेदनको पेशी योसँगै तेस्रोपटक सरेको छ । पहिलोपटक सन्दीपकै कानुन व्यवसायीले स्थगित गरेका थिए भने दोस्रो पटक हेर्न नभ्याइने भएर स्थगन भएको थियो ।

हाल केन्द्रीय कारागारमा रहेका सन्दीपको पक्षमा पछिल्लो समय क्रिकेटरहरू बोल्न थालेका छन् । शरद भेषावकर, आरिफ शेखलगायतले सामाजिक सञ्जालमा सन्दीपको न्यायका लागि दबाब दिएका छन् । एक किशोरीले बलात्कारको आरोप लगाएसँगै सन्दीप पुर्पक्षका लागि थुनामा बसेर न्यायिक लडाईमा छन् ।

क्याटेगोरी : खेल / व्यायाम, जनचासो / सामाजिक सञ्जाल, देश / प्रदेश