Techie IT
Mission Khabar

नेपालको अन्नपूर्ण सर्किट लोन्ली प्लानेटको घुम्नैपर्ने १० गन्तव्य सूचीमा, पर्यटन व्यवसायी हर्षित


काठमाडौं । चर्चित अन्तर्राष्ट्रिय ट्राभल साइट लोन्ली प्लानेटले नेपालको अन्नपूर्ण सर्किटलाई घुम्नैपर्ने १० गन्तव्य सूचीमा समावेश गरेको छ । विश्व चर्चित गन्तव्य अन्नपूर्ण सर्किट यो वर्ष लोन्ली प्लानेटले गन्तव्य सूचीमा परेसँगै कोभिड–१९ ले धारासायी भएको पर्यटन क्षेत्रले केही राहत पाउने आशा गरिएको छ ।

साइटले स्वर्ण मन्दिर, आकर्षक गाउँ, जङ्गल र वन्यजन्तुलाई नजिकबाट नियाल्न सकिने विशेषता उल्लेख गर्दै अन्नपूर्ण घुम्नैपर्ने गन्तव्य भएको उल्लेख गरेको छ । अन्नपूर्णको साहसिक र रोमाञ्चक यात्रा उत्प्रेरक हुने भन्दै पदयात्रापछि थाकेको शरीरलाई स्वादिष्ट परिकार र चियाले भरपुर आनन्द दिलाउन सकिने भनिएको छ । अन्नपूर्ण सर्किटमा रहेका अन्नपूर्ण क्षेत्र, तिलिचो ताल, कालीगण्डकी तथा थोरङ्ला पाससम्मको यात्रा वर्णन गर्दै लोन्ली प्लानेटले विश्वभरका पर्यटकका घुमफिरको योजनामा अन्नपूर्णलाई राख्न सुझाब दिएको छ ।

अन्नपूर्ण क्षेत्र दृश्यावलोकन, उच्च हिमाली भञ्ज्याङ, आरामदायी लज र स्याउका परिकारका लागि चर्चित क्षेत्र हो । पर्यटकीय नगरी पोखराबाट उत्तरी क्षेत्रमा पर्ने यो क्षेत्रमा सात हजार मिटरभन्दा अग्ला १४ हिमाल रहेका छन् । जसमा संसारकै दशौँ अग्लो आठ हजार ९१ मिटरको हिमाल अन्नपूर्ण हो । अन्नपूर्ण दक्षिण र अन्य दर्जनौँ साना मार्ग समेटेर हिमाली गाउँमा जोडिने यो पदयात्रामा दश दिन समय खर्चिनुपर्ने हुन्छ । घुम्नैपर्ने १० गन्तव्यको सूचीको पहिलो नम्बरमा जोर्डनको पेट्रासिटीलाई राखिएको छ । त्यस्तै दोस्रो स्थानमा इक्वेडरको गालापागोस र तेस्रो स्थानमा अष्ट्रेलियाको उलुरु राष्ट्रिय निकुञ्ज परेका छन् । लोन्ली प्लानेट संसारकै विश्वासिलो गाइडबुक तथा ट्राभल वेबसाइट अमेरिकी कम्पनी हो ।

यसमा परेका पर्यटकिय गन्तब्यले विश्वभर चर्चा पाउनुका साथै पर्यटकहरुको रोजाईमा पर्ने गरेका छन् । लोन्ली प्लानेटको उत्कृष्ट पर्यटकिय गन्तब्यका रुपमा अन्नपूर्ण सर्किट परेसँगै कोरोना कहरमा परेको पर्यटन व्यवसायीहरु हर्षित भएका छन् । यो गन्तब्य सूचीले नेपाली पर्यटनमा सकारात्मक टेवा पुग्ने आशा पर्यटन व्यवसायीको छ ।


क्याटेगोरी : देश / प्रदेश, पर्यटन / सम्भावना, समाचार
ट्याग : #hot


तपाईको कमेन्ट लेख्नुहोस्